ಪ್ರೀತಿಯ ರಂಗು

ಭಾವನೆಗಳ ನುಗ್ಗಾಟದಲ್ಲಿ ನೆಲಸೇರಿರುವ
ತರತರಹದ ಕುಂಚಗಳನು ಹೆಕ್ಕಿ ತಂದು
ರಂಗುರಂಗಿನ ಬಣ್ಣವ ತುಂಬಿ
ಮನದಲಿ ಚಿತ್ರವೊಂದನು ಬಿಡಿಸಬೇಕಿದೆ

ನನ್ನ ನಿನ್ನ ನಡುವೆ ಆಡದೇ
ಉಳಿದುಹೋದ ಮಾತುಗಳೆಲ್ಲಾ
ಒಂದಾಗಿ ಸೇರಿ ಮನದಲಿ
ಮೂಡುವ ಚಿತ್ರಕ್ಕೆ ಬಣ್ಣಬಣ್ಣದ
ಕಾರಂಜಿಯನೇ ಸುರಿಸಬೇಕಿದೆ

ನಿನ್ನ ಕಣ್ಣಿಂದ ಹೊಮ್ಮುವ
ಕನಸುಗಳಿಗೆ ನಾ ಬಣ್ಣವಾಗಿ
ಕನಸ ನೋಟದ ಅನುಭಾವಕೆ
ಕನಲಿ ಹೋಗಬೇಕಿದೆ

ಮನದ ಜಾಲಿಕೆಯಲ್ಲಿ ನಿನ್ನ
ಪ್ರೀತಿಯೆಂಬ ರಂಗುರಂಗಿನ
ಸಾವಿರ ಬಣ್ಣಗಳು ಮಿಂದೆದ್ದು
ಎಂದೂ ಮಾಸಿಹೋಗದ ಚಿತ್ರವಾಗಬೇಕಿದೆ....