ಮೋಹಕ ತಂಗಾಳಿಯಲಿ

ಮುಸ್ಸಂಜೆ ಮಬ್ಬಲ್ಲಿ ಇನಿಯನ
ಆಗಮನದ ನಿರೀಕ್ಷೆಯಲ್ಲಿರುವ
ಸಾಗರದ ಅಂಚಲಿ ಕುಳಿತು
ಮನಸೆಂಬ ಪುಸ್ತಕದಲ್ಲಿ ಬರೀ
ನಿನ್ನದೇ ಕವಿತೆ ಬರೆಯಬೇಕಿದೆ

ಮೋಹಕ ತಂಗಾಳಿಯಲಿ
ನೀಲನಭದಿ ಶಶಿಯು ಮೂಡಿ
ಸಾಗರದ ಅಂಚನ್ನು ಚುಂಬಿಸಲು
ನಿನ್ನ ಪ್ರೀತಿಯೆಂಬ ತಂತಿ ಮೀಟಿ
ಹೊಸ ರಾಗ ಹೊಮ್ಮಬೇಕಿದೆ

ಬೆಳದಿಂಗಳ ರಾತ್ರಿಯಲಿ ನಕ್ಷತ್ರಗಳು
ಮಿನುಗುತಿರುವಾಗ ಜಂಟಿಯಾಗಿ ಕೂತು
ಕೈಯೊಳಗೆ ಕೈ ಪೋಣಿಸಿ ಬೇಲಿ
ಹೆಣೆದು ಬೆರಳುಗಳ ಮಧ್ಯದ
ಖಾಲಿತನವನ್ನು ನೀ ತುಂಬಬೇಕಿದೆ

ಆಕಾಶದ ನೀಲಿಮೆಯಲ್ಲಿ ಮೂಡಿರುವ
ನಕ್ಷತ್ರಗಳನು ಬಳಸಿ ನನ್ನ ಕನಸಿಗೆ
ಜೀವ ತುಂಬಿ, ಭವಿತ್ಯದ
ಕವಲಿನಲ್ಲಿ ಮೂಡುವ ನಿನ್ನ
ಕನಸುಗಳಿಗೆ ಚಂದಾದಾರಳಾಗಬೇಕಿದೆ...